દિવસ 17 / 30
ઈશ્વર તમારા શ્વાસ કરતાંય વધારે નજીક છે
38 કેમ કે મને ખાતરી છે, કે ઈશ્વરનો જે પ્રેમ આપણા પ્રભુ ઈસુ ખ્રિસ્તમાં છે, તેનાથી આપણને મરણ, જીવન, સ્વર્ગદૂતો, અધિકારીઓ, વર્તમાનનું, ભવિષ્યનું, પરાક્રમીઓ, 39 ઊંચાણ, ઊંડાણ, કે કોઈ પણ બીજી સૃજેલી વસ્તુ અલગ કરી શકશે નહિ.
હું સેન્ટ જૉન્સની એક શાળામાં ફ્રેંચ શિક્ષિકા તરીકે કામ કરતી હતી. એક દિવસ મારાં મમ્મીનો સાવ અણધાર્યો ફોન આવ્યો. તેમણે કહ્યું કે પપ્પાને હાર્ટ એટેક આવ્યો છે અને તેમને ગ્રાન્ડ ફૉલ્સની હૉસ્પિટલમાં લઈ ગયા છે. સ્ટીવ અને હું હૉસ્પિટલ પહોંચ્યાં ત્યાં સુધીમાં પપ્પાની હાલત સ્થિર થઈ ગઈ હતી. હાશ!
પણ પછી એક રાત્રે બહુ મોડેથી ફોન આવ્યો કે તેમની તબિયત અચાનક વધારે બગડી ગઈ છે.
મને યાદ છે, હું તેમના હૉસ્પિટલના રૂમમાં ગઈ ત્યારે જોઈ શકતી હતી કે તેમનું હૃદય જોરજોરથી ધબકી રહ્યું હતું. ધબકારા એટલા ઝડપી હતા કે તેમની છાતી ઊંચીનીચી થતી મને નજરે દેખાતી હતી. મને ખરેખર બીક લાગી કે તેઓ નહિ બચે. મને યાદ છે કે મેં પપ્પા માટે આ શબ્દો બોલ્યા હતા: “હું મરણ પામીશ નહિ, પણ જીવતો રહીશ અને યહોવાહનાં કૃત્યોને પ્રગટ કરીશ.” (ગીતશાસ્ત્ર 118:17, IRV પર આધારિત.)
મને એ કહેતાં બહુ આનંદ થાય છે કે મારા પપ્પા એ મુશ્કેલીમાંથી સાજા થઈ ગયા!
આ વાત હું એટલા માટે કહું છું કે પછીથી પપ્પાએ મને એક વાત કહી હતી. મેં તેમને પૂછ્યું હતું કે શું તમને મરવાની બીક લાગતી હતી? તેમણે કહ્યું કે તેમને જરાય ડર નહોતો.
તેમણે મને એક ઊંડી વાત પણ સમજાવી – તેમણે કહ્યું કે ફેફસાંમાં બીજો શ્વાસ ભરી શકશે કે નહિ એની તેમને ખાતરી નહોતી, પણ એ વાતની પાકી ખાતરી હતી કે ઈશ્વર ત્યાં તેમની સાથે હતા. “ઈશ્વર તો તારા શ્વાસ કરતાંય વધારે નજીક છે!”
જ્યારે મને બીક લાગે છે ત્યારે આ સત્ય મને દિલાસો આપે છે. ગોર્ડન જેન્સનનું ગીત He’s as Close as the Mention of His Name (તેમનું નામ લેતાં જ તે પાસે છે) તમે સાંભળ્યું છે? હું માનું છું કે તે એના કરતાંય વધારે નજીક છે. આપણે એક શબ્દ પણ બોલી ન શકીએ ત્યારે પણ ઈશ્વર ત્યાં હોય છે. તમારો બીજો શ્વાસ ન આવે ત્યારે પણ ઈશ્વર ત્યાં હોય છે!
મરણ પણ તમને ઈશ્વરના પ્રેમથી અલગ કરી શકતું નથી! મનની આવી શાંતિ અમૂલ્ય છે.
આજે ઈશ્વર તમને આશીર્વાદ આપે.
મનન
ક્યારે તમને બીક લાગી હતી, કે પ્રાર્થના કરવા માટે શબ્દો જડતા નહોતા? ઈશ્વર તમારી પાસે છે એ જાણવું તમારે માટે શું અર્થ ધરાવે છે?
પ્રાર્થના
હે પિતા, હું પ્રાર્થના માટે શબ્દો શોધી ન શકું ત્યારે પણ મારી પાસે રહેવા માટે તમારો આભાર. જ્યારે મને બીક લાગે ત્યારે મને તમારા પ્રેમની યાદ અપાવો. દરેક અનિશ્ચિત પળે તમારી હાજરી પર ભરોસો રાખવામાં મને મદદ કરો. આમેન.