Jou 4 sou 30
Li p ap janm lage w
Lekti nan Bib la
Pa kite renmen lajan pran nanm nou. Se pou nou kontan ak sa nou genyen. Paske Bondye te di: Mwen p'ap janm vire do ba ou, mwen p'ap janm lage ou.
Lè m te tifi, papa m te konn mennen m nan pak timoun yo. Mwen te renmen balanse nan balansin yo! Nou te konn rete la yon bon ti tan, men finalman lè a te rive pou Papa di nou dwe tounen lakay.
Mwen pa t vle tounen lakay.
Papa m te konn jwe yon ti tou ak mwen – li te konn kache. Lè je m te fè wonn pak la, mwen pa t ka wè papa m okenn kote. Panik. Mwen te konn pran kouri tankou yon fou nan direksyon lakay.
Answit papa m te konn soti kote l te kache a epi mwen te wè l. Fyou! Li te toujou la. Devine kisa m te konn fè apre? Mwen te konn kouri tounen dwat nan pak la ankò!
Lè m panse ak sitiyasyon sa a nan lavi m, mwen panse ak lefèt ke, menm si nou ka santi nou pou kont nou, Bondye p ap janm kite nou ni lage nou.
Anpil moun jodi a, papa yo sou tè a te abandone yo. Lè yo rankontre yon Papa ki nan syèl la, yo gen difikilte paske yo pè pou li menm tou pa kite yo. Nou ka sèten nèt ale Bondye toujou avèk nou e li p ap janm kite nou. Nou p ap janm san papa. Menm si paran nou abandone nou, Bondye toujou la tou pre.
Sòm 27:10 se yon bèl vèsè ki montre kè Bondye, Papa a:
Papa m' ak manman m' te mèt lage m', Seyè a va ranmase mwen.
Sa se yon gwo konsolasyon pou moun pwòp papa yo oswa pwòp manman yo te rejte.
Mwen konn ri lè m sonje sa m te konn fè lè m te wè papa m soti kote l te kache a. Mwen te konn kouri tounen dwat nan pak la ankò! Èske nou pa menm jan an ak Bondye? Li vle nou swiv li, men nou vle pran pwòp chemen pa nou. Mèsi Bondye, li pa lage nou! Menm jan papa m te la ap tann mwen, se konsa Papa a ap tann nou.
Mwen pa ka pa panse ak Parabòl pitit gason ki te pèdi a (Lik 15). Pitit gason sa a te gaspiye eritaj li, epi li te rann li kont li te dwe tounen lakay papa l.
Msye te byen lwen kay la toujou lè papa a wè li.
Papa l t ap tann, l t ap veye pou pitit gason li te renmen anpil la tounen lakay!
Kòm kretyen, nou bezwen konprann kijan Papa nou ki nan syèl la renmen nou tout bon, kijan li plen gras, mizerikòd ak konpasyon!
Bondye beni w jodi a.
Refleksyon
Ki lè ou te santi w pou kont ou? Kouman pwomès Bondye fè w ke li p ap janm lage w ankouraje w pou w fè l konfyans?
Lapriyè
Papa, mèsi paske ou p ap janm kite m ni lage m. Ede m fè renmen w konfyans menm lè m santi m pou kont mwen. Rale m pi pre w, e ban m yon kè ki dispoze pou swiv ou kote ou mennen m. Amèn.