Araw 13 ng 30
Isang Personal na Diyos
1 Oh Panginoon, iyong siniyasat ako, at nakilala ako.
2 Iyong nakikilala ang aking pag-upo at ang aking pagtindig, iyong nauunawa ang aking pagiisip sa malayo.
3 Iyong siniyasat ang aking landas at ang aking higaan, at iyong kilala ang lahat kong mga lakad.
4 Sapagka't wala pa ang salita sa aking dila, nguni't, narito, Oh Panginoon, natatalastas mo nang buo.
5 Iyong kinulong ako sa likuran at sa harapan, at inilapag mo ang iyong kamay sa akin.
6 Ang ganyang kaalaman ay totoong kagilagilalas sa akin; ito'y mataas, hindi ko maabot.
13 Sapagka't iyong inanyo ang aking mga lamang loob: iyo akong tinakpan sa bahay-bata ng aking ina.
14 Ako'y magpapasalamat sa iyo; sapagka't nilalang ako na kakilakilabot at kagilagilalas: kagilagilalas ang iyong mga gawa; at nalalamang mabuti ng aking kaluluwa.
16 Nakita ng iyong mga mata ang aking mga sangkap na di sakdal, at sa iyong aklat ay pawang nangasulat, kahit na ang mga araw na itinakda sa akin, nang wala pang anoman sa kanila,
17 Pagka mahalaga rin ng iyong mga pagiisip sa akin, Oh Dios! Pagka dakila ng kabuoan nila!
18 Kung aking bibilangin, higit sila sa bilang kay sa buhangin: pagka ako'y nagigising ay laging nasa iyo ako.
Ang paghawak-kamay ay isang malapít at personal na kilos. Tanda ito ng pagsasama. Minsan, kapag may taong maysakit, hinahawakan natin ang kamay niya para malaman niyang nandiyan tayo. Kapag naglalakad ang magkasintahan sa kalye, baka magka-holding hands sila.
Naaalala ko nang manood kami ni Steve ng concert ni Diana Krall. Pakiramdam ko’y nasa sala lang kami ng bahay at kumakanta siya para sa amin. Napakagandang karanasan iyon. Sa isang punto, kung tama ang pagkakaalala ko, inabot ni Steve ang kamay ko at hinawakan ito. Napaka-personal at napakalapít ng sandaling iyon, kaya sa tingin ko ay napaiyak ako. (Hindi na nakagugulat iyan!)
Kailangan nating maunawaan na mas kilala tayo ng Diyos kaysa sinumang tao. Alam Niya ang lahat tungkol sa atin! Sa kabila ng ating mga kahinaan, mahal pa rin Niya tayo. Puwede nating ibuhos sa Kaniya ang ating puso. Puwede nating ipagkatiwala sa Kaniya ang kahit ano. Siya ay isang personal na Diyos at gusto Niyang magkaroon ng personal na relasyon sa atin. Gusto Niyang hawakan ang ating kamay dahil gusto Niyang maging bahagi ng ating buhay.
Ngayon, iyan ay dapat nating pag-isipan!
Pagpalain ka ng Diyos ngayong araw.
Pagninilay
Ano ang gusto mong ibahagi sa Diyos ngayon, gayong alam mong kilalang-kilala ka na Niya at mahal ka Niya?
Panalangin
Panginoon, salamat na kilalang-kilala Mo ako at mahal Mo pa rin ako. Tulungan Mo akong makipag-usap nang tapat sa Iyo at ipagkatiwala sa Iyo ang laman ng aking puso. Salamat na gusto Mong magkaroon ng personal na relasyon sa akin. Amen.