Araw 27 ng 30
Pula ang Rosas
9 Inagaw mo ang aking puso,
kapatid ko, kasintahan ko,
iyong inagaw ang aking puso ng isang sulyap ng iyong mga mata,
ng isang kuwintas ng iyong leeg.
10 Pagkaganda ng iyong pagsinta,
kapatid ko, kasintahan ko!
Pagkaigi ng iyong pagsinta kay sa alak!
At ang amoy ng iyong mga langis kay sa lahat na sari-saring pabango!
Hindi masasabing sobrang romantiko si Steve. Ang una naming date ay double date pa. Hindi ko na papangalanan ang isa pang magkapareha. Nagpasya ang mga lalaki na sila ang magluluto ng hapunan para sa mga babae. Ang gourmet na menu: pizza at Jello… Hindi ito biro… Nadulas ang toppings ng pizza mula sa crust habang inihahain, at hindi tumigas ang Jello.
Sa isang bahagi ng gabing iyon, binigyan ako ni Steve ng rosas. Nasa Grade 11 kami noon at gumawa si Steve ng research paper tungkol sa ozone layer. Ang kard na nakakabit sa rosas ko ay may ganitong tula na si Steve mismo ang sumulat:
Pula ang rosas
Asul ang violeta
Kapag nasira ang ozone
Mamamatay itong bulaklak
Sino pa ang nangangailangan kay William Shakespeare kung kaya mo namang sumulat ng ganito kagagandang bagay? Ngayon alam mo na kung bakit hindi ko natanggihan ang karisma niya!
Alam mo ba na ang relasyon ni Jesus at ng Simbahan ay inihahambing sa relasyon ng isang lalaking ikakasal at ng kanyang nobya? Si Jesus ang lalaking ikakasal. Tayo ang Kanyang nobya. Napakaganda ng larawan ng pag-ibig sa pagitan ng nobya at ng lalaking ikakasal na ito.
Umiibig si Jesus sa Kanyang nobya. Pinatunayan Niya ang Kanyang pag-ibig sa Kanyang mga salita at gawa. Maglaan ka ng oras para basahin ang pinakadakilang kuwento ng pag-ibig sa lahat. Subukan mong unawain kung gaano Niya tayo kamahal!
Mga lalaki, baka ma-inspire pa kayong sumulat ng magandang tula!
Pagpalain ka ng Diyos ngayong araw.
Pagninilay
Paano ipinakita ni Jesus ang Kanyang pag-ibig sa iyo? Ano ang tumutulong sa iyo na maunawaan kung gaano Niya kamahal ang Kanyang bayan?
Panalangin
Jesus, salamat po sa labis Mong pagmamahal sa Iyong bayan. Tulungan Mo akong mas maunawaan ang Iyong pag-ibig at tumugon nang may pusong nagpapasalamat. Nawa’y maipakita ng aking mga salita at gawa ang Iyong pag-ibig sa iba. Amen.