Araw 15 ng 30
Lahat ay Nagiging Mabuti para sa Atin
At nalalaman natin na ang lahat ng mga bagay ay nagkakalakip na gumagawa sa ikabubuti ng mga nagsisiibig sa Dios, sa makatuwid baga'y niyaong mga tinawag alinsunod sa kaniyang nasa.
May masasamang nangyayari sa paligid natin. May masasamang nangyayari sa atin mismo. Hindi ang Diyos ang nagpapangyari ng mga ito. Ang masasakit na pinagdadaanan natin ay hindi nangangahulugang tumigil na ang Diyos sa pagmamahal sa atin. May kaaway tayo, ang diyablo at ang kaniyang mga demonyo, na lumilikha ng gulo at kasamaan sa mundo.
Mabuting Diyos ang Diyos. Siya ay mabuting Ama. Kukunin Niya ang bawat sitwasyong hinaharap natin at maglalabas ng mabuti mula rito.
Tingnan natin ang kuwento ni Jose. Binigyan ng Diyos si Jose ng malalaking panaginip. Hindi nagustuhan ng mga kapatid niya ang mga panaginip na ikinuwento ni Jose sa kanila. Noong una, papatayin sana nila ang kanilang kapatid, pero sa huli ay ipinagbili siya bilang alipin. Isipin mo, ipinagbili ka ng sarili mong pamilya!
At hindi pa doon natatapos ang kuwento! Pinagbintangan si Jose ng krimeng hindi niya ginawa. Ikinulong siya. Ilang taon siya roon!
Pero nang maging makapangyarihan si Jose sa Egipto, sinabi niya sa kaniyang mga kapatid:
At tungkol sa inyo ay inyong ipinalagay na kasamaan laban sa akin; nguni't ipinalagay ng Dios na kabutihan
Pinagagawa ng Diyos ang lahat para sa ikabubuti ng mga nagmamahal sa Kaniya, na mga tinawag ayon sa Kaniyang layunin!
Baka nasa napakahirap na sitwasyon ka ngayon. Baka dumaan ka sa trahedya, sirang relasyon, sakit, panghihina ng loob.
Makatitiyak ka na kung mahal mo ang Diyos at ipinagkatiwala mo sa Kaniya ang buhay mo, kumikilos Siya—kahit hindi mo ito nakikita. Baka hindi natin naiintindihan kung paano o kailan, pero puwede tayong magtiwala na maglalabas Siya ng mabuti mula sa ating pinagdadaanan, para sa Kaniyang karangalan at kaluwalhatian.
Pagpalain ka ng Diyos ngayong araw.
Pagninilay
May mahirap bang sitwasyon sa buhay mo na hindi mo maintindihan? Ano ang nagpapalakas ng loob mo sa kuwento ni Jose? Maglaan ng sandali para dalhin sa Diyos ang sitwasyon mo at hilingin sa Kaniya na tulungan kang magtiwala sa Kaniya, kahit habang naghihintay ka.
Panalangin
Ama, salamat na Ikaw ay mabuting Ama. Nakikita Mo ang pinagdadaanan ko, at alam Mo ang nararamdaman ko. Tulungan Mo akong magtiwala sa Iyo kapag hindi ko naiintindihan ang nangyayari o hindi ko makita ang daan pasulong. Bigyan Mo ako ng lakas para sa araw na ito at ng pasensya habang naghihintay ako. Inilalagay ko ang sitwasyong ito sa Iyong mga kamay. Maglabas Ka ng mabuti mula rito, at nawa’y magbigay ng karangalan at kaluwalhatian sa Iyo ang buhay ko. Sa pangalan ni Jesus, amen.